Господарот на Дубаи го презема Ливерпул?

Шеикот Мухамед бин Рашид Ал Мактоум, кој е петти најбогат човек во светот, има навистина сериозна намера да го преземе тимот од Енфилд Роуд.

Само неколку дена откако инвестициската куќа Јунајтед Груп од Абу Даби го купи Манчестер Сити, англиските медиуми пишуваат дека на вратата на Ливерпул повторно тропа еден од главните луѓе во Дубаи - шеикот Мухамед бин Рашид Ал Мактоум (арапски: راشد بن سعيد آل مكتو).

Шеикот се обиде да го купи Ливерпул и пред две години, но тогаш беше ’истуркан’ од Американците на кои Мухамед, инаку и премиер на Обединетите Арапски Емирати, им понудил чесно да отстапат од позицијата и да му го продадат клубот.

Не е претерано доколку кажеме дека навивачите на црвените ги мразат сегашните сопственици, а во средата навечер дури и ја замолија Кралската банка на Шкотска да ја прекине финансиската поддршка кон нив.

Шеикот Мухамед, како што велат медиумите, во тоа ја препознал својата прилика, па ќе им понуди на сегашните сопственици малку профит, само да се ’изгубат’ од Енфилд Роуд.

Се очекува дека неговата понуда за да го преземе клубот ќе изнесува околу 615 милиони евра.

За оние кои досега немаат слушнато за овој човек, да истакнеме дека тој е на петтото место на листата со најбогати луѓе во светот, а неговото богатство е проценето на нешто повеќе од десет милијарди долари.

Досега тој на два пати се запиша во Гинисовата книга на рекорди. Првиот пат во 1981 година кога на неговата венчавка потроши 44 милиони долари (сега би биле околу 100 милиони), а вториот рекорд го направи кога плати 10.2 милиони долари за коњ со име Снафи. Воедно шеикот е сопственик и на 163 метарска јахта која е една од неколкуте во целиот свет.

Филип Крстевски/Таратур

Спорт