Барак Обама на клупата на Вест Хем

Сепак, шансите за да се реализира ова, според познатата англиска обложувалница Вилијам Хил, се 10.000:1.

Стадионот на Вест Хем би можел да биде идна дестинација на претседателскиот кандидат Барак Обама, барем ако им веруваме на навивачите на англискиот прволигаш...

Кандидатот на Демократската партија за претседател на САД е еден од луѓето кои се најдоа на листата со кандидати за наследник на Алан Курбишли, но на онаа листа која ја објави познатата обложувалница.

Виновник за ова е неименуван лондонски бизнисмен кој предложил Обама да се најде на листата со кандидати, а од обложувалницата му дале коефициент од 10 илјади. Бизнисменот вложил десет фунти.

Како што велат луѓето од Вилијам Хил, облогот го прифатиле затоа што не е возможно тоа да се оствари. Доколку сепак по некое чудо се случи тоа, тој бизнисмен ќе добие 100.000 фунти (123.260) евра.

Од почетокот на претседателската кампања во САД низ Лондон се шират гласини дека Обама е навивач на Вест Хем, откако пред пет години за прв пат го посетил Лондон.

Портпаролот на обложувалницата, Грејем Шарп, во интервју за медиумите изјави: „Поставивме огромен коефициент затоа што претпоставуваме дека Обама во овој момент размислува како да дојде до малку поважно работно место. Ако ја изгуби претседателската трка, кој знае... Се е можно“.

Инаку од кандидатите за претседателски избори во САД, според обложувалницата, токму Обама е фаворит со коефициент 4:9, додека шансите на неговиот ривал се 13:8.

Според нив, во овој момент најголеми шанси да стане тренер на Вест Хем има селекторот на Хрватска Славен Билиќ со коефициент 3:1.

Филип Крстевски/Таратур

Спорт