Груевски најомилен политичар

Премиерот Никола Груевски и понатаму е најпопуларен политичар кај Македонците. Според анкетата што ја направи Таратур, над половината од испитаниците гласаа за Груевски, додека како единствен ривал се наметнува претседателот Црвенковски.

Македонскиот премиер Никола Груевски е најомилениот политичар, покажа анкетата на Таратур спроведена од 19 до 26 август годинава. Вкупно гласаа 1421 посетител, од кои дури 55% за лидерот на ВМРО ДПМНЕ, а како единствен опонент се наметна претседателот на Македонија Бранко Црвенковски.

Претседателот, кој најави враќање во редовите на СДСМ и се впушти во политичка борба со владејачката партија, очигледно ги доби симпатиите кај членовите и поддржувачите на СДС, па така за Црвенковски гласаа 24% од гласовите, додека лидерката во оставка Шекеринска доби само 4%, а поранешниот лидер Бучковски одвај два.

Од политичарите од партиите на албанското малцинство, најпопуларен е претседателот на ДУИ, Али Ахмети со 5%, за водачот на ДПА, Мендух Тачи гласаа 3 проценти, а за поранешниот министер за здравство Имер Селмани два посто.

Од останатите политичари кои Таратур ги наведе во анкетата, Љубисав Иванов Ѕинго доби 3%, а Тито Петковски и Јово Манасијевски имаат неверојатно низок рејтинг со оглед на тоа што за нив гласаа само по еден процент од испитаниците.

Поради лидерската криза во врвот на СДСМ, Таратур ќе се обиде да и помогне на најголемата опозициска партија, со тоа што ќе го измери пулсот на македонските граѓани во врска со нивниот став за можен лидер на партијата.

Даваме неколку предлози кои сметаме дека се најсериозни, личности околу кои се врти името на (старо) новиот предводник на партијата, која ја поминува најголемата криза од нејзиното постоење досега, а како опција ги понудивме и „да остане Радмила Шекеринска“, како и „на партијата и треба ’ново лице’“.

Таратур Објавува