Нимиц може да ги „замрзне“ разговорите

Како што тврдат грчките медиуми, Нимиц наводно ќе ги замрзне разговорите за името, ако Македонија продолжи со некооперативниот став. Македонската влада обвинува дека другата страна не сака решение.

Посредникот Метју Нимиц ја разгледува можноста да ги „замрзне“ разговорите за името доколку Македонија продолжи со некооперативниот став до седницата на Генералното собрание на ОН, кон крајот на септември.

Оваа вест, како што јавува Макфакс, денеска ја објавува конзервативниот атински весник „Катимерини“, повикувајќи се на неименувани извори.

Весникот наведува дека медијаторот Метју Нимиц „е налутен“ поради ставот на премиерот Никола Груевски дека Македонија нема да прифати едно име како решение за спорот, соопштен овој викенд.

Нимиц, според „Катимерини“, на неодамнешната средба во Скопје, го предупредил Груевски дека неговиот непопустлив став може да доведе до шестмесечно замрзнување на разговорите.

Сепак, медијаторот е убеден дека Македонија е подготвена да ги засили преговорите, пишува англиското издание на Катимерини.

Грчки дипломати за весникот потврдиле дека Нимиц го отворил прашањето за Македонската Православна Црква за време на разговорите со Вселенскиот патријарх Вартоломеј на Атос. Според нив, меѓутоа, нема докази дека прашањето за црквата била главна точка на разговорите.


Боцевски -Грција не сака решение за името

Грција е страната која не сака да се надмине спорот за името, порача денеска македонскиот вицепремиер за европски прашања Ивица Боцевски.

„На цел свет му е јасно која е страната, која што не сака да се надмине спорот, тоа републиката, чиј што главен град е Атина“, изјави Боцевски за Макфакс, запрашан да ги коментира наводите на грчкиот печат дека медијаторот Метју Нимиц размислува за „замрзнување“ на преговорите за името.

„Македонија и натаму останува активен и конструктивен учесник во овие процеси“, изјави вицепремиерот.

Конзервативниот „Катимерини“ денеска пишува дека посредникот Нимиц ја разгледува можноста да ги „замрзне“ преговорите, доколку Македонија продолжи со некооперативниот став до седницата на Генералното собрание на ОН кон крајот на септември. Атинскиот весник, како што пренесува Макфакс, се повикува на неименувани извори.


Макфакс/Таратур

Вести