Откако пред неколку дена Јан Ашер за 383.200 долари си го продаде животот, еден млад Новозеланѓанин се одлучи да ја продаде својата душа преку аукцискиот сајт TradeMe.

Душата на 24-годишниот Валтер Скот од Нов Зеланд се продава преку аукциската веб страница TradeMe. Првите понуди веќе пристигнаа, а бројот на заинтересирани е над сто.

Скот тврди дека со години размислувал да ја продаде својата душа.

„Не можам да ја видам, ни да ја допрам, но затоа можам да ја продадам. Иден сопственик ќе стане оној кој ќе понуди највисока цена“, вели Скот.

Како што стои во понудата, се работи за душа во прилично добра состојба, која пред шест години поминала низ еден тежок период.

Новиот сопственик, сопствеништвото на неговата душа, ќе може да ја потврди со заверен договор, но како што истакнуваат адвокатите, нема да може да управува со неговиот живот.

Мајкл О`Донел, уредникот на аукциската страница преку која се продава душата, вели дека воглавно постојат проблеми кога се продава нешто нематеријално, но истакнува дека постоењето на договор значително ги менува работите.

Валтер Скот не е прв кој се сети да ја продаде својата душа. Прв забележан случај на интернет е во 2001 година, кога американскиот студент Адам Бартл се обиде преку eBay да заработи од својата душа, но не успеа во тоа. Пред да ја повлече од продажба, цената која ја достигна неговата душа изнесуваше само 400 долари.