Мрежата на сите мрежи целосно легитимно е номинирана за Нобеловата награда за мир „за ширење на комуникациите и разбирање меѓу луѓето“. Не се знае само кој во име на Интернетот ќе ја прими наградата.

Ако минатата година многу прашина се крена околу доделувањето на Нобеловата награда на американскиот претседател Барак Обама, номинацијата на Интернетот ќе предизвика уште поголеми контроверзи, пишува The Tech Journal.

Но оваа номинација не треба да зачудува бидејќи токму интернетот урна многу ѕидови на цензурата.

Интернетот е номиниран заедно со кинеските дисиденти и руските активисти за човекови права. Идејата дошла од италијанското издание на магазинот Wired, со што интернетот е првиот нежив објект што се наоѓа на листата на номинирани.

Wired го номинираше интернетот за промовирање на дијалогот, расправата и консензусот преку комуникација, како и демократија.

Сепак многу е необично што интернетот е номиниран за наградата, бидејќи тој не припаѓа на никого и се наоѓа секаде во светот. Покрај тоа се претпоставува дека кандитатурата на интернетот има мали шанси да ја добие наградата, не само затоа што не се знае кој би ја примил, туку затоа што се очекува после минатогодишните контроверзи со Барак Обама, комитетот за доделување да се одлучи за поконзервативен избор.