Секој ден во текот на 2009 година во Венецуела биле убивани по 44 лица во просек. Од нив, 60 проценти се убиени со пет или повеќе куршуми!

Просечно по 44 лица дневно биле убивани во Венецуела од огнено оружје во текот на изминатата година, објавија локалните медиуми кои се повикуваат на неофицијални полициски извори, или вкупно16.094 лица, што е за 1.265 повеќе во однос на 2008 година. Главниот град Каракас е најопасен, таму биле застрелани 2.897 лица.

Власта избегнува да ги објави официјалните податоци, а на основа на полициска статистика до која дошле дел од медиумите, дури 60 отсто од жртвите биле застрелани со пет или повеќе куршуми, а 36% имале меѓу 15 и 29 години.

Социјалистичката влада на претседателот Хуго Чавез не објави официјални податоци за криминалот, а анкетите покажуваат дека населението најмногу е загрижено поради порастот на насилството, дури повеќе и од невработеноста.

Во Каракас каде живеат пет милиони луѓе, стапката на убиства е 100 на 100.000 жители, дури 11 пати повеќе од просечната во светот. Се смета дека во земјата која се претставува како ’социјалистички рај’ има 27 милиони жители, а во неконтролиран промет меѓу 9 и 15 милиони парчиња оружје.