Министерката за внатрешни работи Гордана Јанкулоска нема информации дали расчинетиот владика на МПЦ, Јован Вранишкоски е шпион на грчките и српските разузнавачки служби.

Јанкулоска не е запознаена дали Вранишкоски добил дозвола за носење оружје од битолската полиција, како што обвини Народното движење на Македонија минатата недела.

„МВР не би требало и не би смеело да се впушти во реплики на секоја политичка партија. Прашањата кои се од значење за безбедноста на Македонија се наша секојдневна работа и ние со нив се занимаваме во редовна процедура“ рече Јанкулоска.

„Доколку оцениме дека има потреба да ја информираме јавноста кога станува збор за државната безбедност тоа ќе биде направено, но не на база на прозивки на политички партии и меѓусебни обвинувања“ додаде Јанкулоска.

Инаку, Вранишкоски вчера држеше Богослужба во Јовановата црква во Нижеполе. Тој уште не може да добие правен легитимитет во Македонија. Последната одлука на судот за него била уште еден доказ дека ние како земја сме биле далеку од демократијата.

„Моите настапи се јавни. Шпионите обично работат по други методи, конспиративно и не се покажуваат. Значи малку е неспоиво и затоа ми изгледа непристојно да одговарам на прашање кое само по себе е нелогично. Второ, можеби уште посуштинско е прашањето што може да се шпионира од Македонија за другите. Трето, каков пристап јас имам последните седум години со некакви служби во Македонија па да можам да поделам некакви тајни?“ изјави вчера Вранишкоски.

Тој и неговата црква се за лустрација и на црковните лица во Македонија.

---

Copyright 2010 Makfax. Сите права се задржани. Текстов не смее да се печати или емитува, во целина или во делови, без договор со Makfax