Идиотските квизови кои кај нас измамуваат илјадници луѓе ќе бидат забранети во Србија и нема да можат да се емитуваат на ТВ.
Српското министерство за финансии и Управата за игри на среќа наложија стопирање на емитувањето на овие квизови, кои се всушност игри на среќа.
„Таквите квизови се софистициран облик на измама, бидејќи лажно ја прикажуваат можноста за добивка, која е енормно мала во однос на бројот на луѓе кои се јавуваат да учествуваат во играта“, изјавија за Политика од српското обвинителство, додавајќи дека ваквите измами се забранети во многу други земји (не и во Македонија).
Суштината на овие ’квизови’ е користење на неинформираност на учесниците. За разлика од вистинските квизови каде што најважен фактор за успех е знаењето, во овие е среќата, со што не спаѓаат во таа категорија.
Исходот на квизовите зависи од случајност или неизвесен настан што ги прави игри на среќа. Гледачите често не знаат дека секој повик ќе им биде наплатен повеќе отколку обично, а дека тоа не им гарантира вклучување во квизот.
Во Македонија секојдневно илјадници граѓани наседнуваат на ТВ измамата која без проблем се емитува скоро на сите национални телевизии. Во ’квизот’ обично фрустрирана девојка ги тера гледачите да се јават објаснувајќи им колку е лесно да ги добијат парите што се нудат.
Цената за едно јавување е над 40 денари, а граѓаните често се жалат дека по само едно јавување им доаѓаат астрономски телефонски сметки.
6.07.2009
